После ремито со Алкалоид во првото коло, како и големата победа над Струга, Охриѓани викендов му гостуваат на Вардар во Скопје.
Со оглед на тоа дека во новата сезона, Охрид тргна со нов тренер, како и многу нови засилувања, тие досега и во подготвителниот период се наметнаа како сериозен претендент во борбата за титула. Имено, тие ги освоија и Струшкиот и Охридскиот Турнир, ремизираа во првото коло со екипата на Алкалоид на гостински терен, и убедливо ја совладаа Струга во второто коло на домашен терен, па очекуваме да гледаме интересен дерби- дуел против Вардар, во Скопје.
Охридскиот чувар на мрежата- голманот Даниел Ѓорѓески, за Спортска Мрежа го најави мечот од третото коло, кој ќе се одигра во сабота. Според него, Вардар е екипа со одлична одбрана, но смета дека ако тие го дадат својот максимум, можат да стигнат до поволен резултат:
,, Викендов играме против екипата на Вардар, на гостински терен. Вардар е одлична екипа, која игра доста добро, особено во одбрана. Ние ги анализираме, се подготвуваме максимално за овој натпревар и мислам дека ако секој од нас го даде својот максимум, можеме да постигнеме позитивен резултат во сабота. “ – вели искусниот голман.
Натпреварот е закажан во сабота, со почеток од 18:00 часот во СЦ ,,Борис Трајковски“, а исто така најавено е дека Охрид ќе има поддршка и од својата навивачка група- Рибари, која ќе ги бодри од трибините.
