По четири одиграни кола време е за „нова лупа“ на табелата во Втората македонска фудбалска лига и да видиме како стојат работите на истата.
Четири екипи го држат врвот со по 10 бодови, но поради подобрата гол разлика Кожуф од Гевгелија кој го предводи младиот стратег Иван Варадиновски е на врвот од табелата со десет бодови, колку што има Брегалница која е втора, Шкендија Арачиново која е трета и Беласица која е четврта.
Кожуф го има најдобриот напад кој реализирал 12 погодоци, а толку имаат и Брегалница и Беласица, но тимот од Гевгелија ја има најдобрата одбрана со само два примени погодоци, а пак одбраните на Брегалница и Шкендија имаат по три примени погодоци.
Најблиску до врвот или само три бода разлика се екипите на Охрид и Скопје кои го делат петтото место. Популарните „рибари“ се наоѓаат на петтата позиција со седум бодови, а пак „пиратите“ од Автокоманда го држат шесттото место.
Три екипи имаат по шест бодови, Детонит Плачковица кој е седми, Новаци кој е осми и Тетекс кој се наоѓа на деветтата позиција на табелата. Каменица Саса конечно дојде до триумф откако со 1:8 го „прегази“ Вардар Неготино и така сега „рударите“ имаат пет бодови и се пробија до десеттото место на табелата. Осогово е на 11-тото место со четири бодови на своето конто.
По три бодови имаат екипи на Слога Виница, Преспа и Вардар Неготино кои го делат 12-тото место на табелата, само еден бод има тимот на Победа, а на дното без бодови е Големо Коњари.
Најлош напад со само два постигнати погодоци на четири натпревари има Големо Коњари, а исто така овој тим ја има и најлошата одбрана која прими 20 погодоци на четири натпревари или во просек по пет погодоци. Втора најлоша одбрана има тимот на Вардар Неготино, која има примено 14 погодоци, а од кои осум само на мечот со Каменица Саса.
Дефинитивно имаме една интересна сезона, досега се одиграни 32 натпревари, а само на еден меч немаше погодоци, тој во Штип од првото коло кога Брегалница и Кожуф ремизираа без погодоци (0:0), додека на сите други 31 натпревар беа постигнати погодоци. Само во четвртото коло беа постигнати фантастични 40 погодоци.
Тимот на Каменица Саса ја држи највисоката победа засега во сезоната од 1:8 над Вардар Неготино, а тимот од Неготино го има највисокиот пораз засега.
| Поз. | Клуб | ОН | Поб | Н | Пор | ПОС | ПРИ | ГР | БОД |
|---|---|---|---|---|---|---|---|---|---|
| 1 | ФК КОЖУФ ГЕВГЕЛИЈА ➖ | 4 | 3 | 1 | 0 | 12 | 2 | +10 | 10 |
| 2 | ФК БРЕГАЛНИЦА 2008 АД ➖ | 4 | 3 | 1 | 0 | 12 | 3 | +9 | 10 |
| 3 | ЗФК Шкендија Арачиново 77 🔽 | 4 | 3 | 1 | 0 | 11 | 3 | +8 | 10 |
| 4 | ФК БЕЛАСИЦА АД 🔼 | 4 | 3 | 1 | 0 | 12 | 4 | +8 | 10 |
| 5 | ГФК ОХРИД ЛИХНИДОС ➖ | 4 | 2 | 1 | 1 | 7 | 5 | +2 | 7 |
| 6 | ФК СКОПЈЕ АД ➖ | 4 | 2 | 1 | 1 | 8 | 7 | +1 | 7 |
| 7 | ФК ДЕТОНИТ ПЛАЧКОВИЦА 🔽 | 4 | 2 | 0 | 2 | 7 | 4 | +3 | 6 |
| 8 | ЗФК НОВАЦИ 2005 ➖ | 4 | 2 | 0 | 2 | 7 | 8 | -1 | 6 |
| 9 | ФК ТЕТЕКС 1953 🔼 | 4 | 2 | 0 | 2 | 7 | 10 | -3 | 6 |
| 10 | ФК КАМЕНИЦА САСА 🔽 | 4 | 1 | 2 | 1 | 12 | 7 | +5 | 5 |
| 11 | ГФК ОСОГОВО ➖ | 4 | 1 | 1 | 2 | 5 | 6 | -1 | 4 |
| 12 | ФК СЛОГА 1934 ➖ | 4 | 1 | 0 | 3 | 5 | 5 | 0 | 3 |
| 13 | ФК ПРЕСПА ➖ | 4 | 1 | 0 | 3 | 6 | 12 | -6 | 3 |
| 14 | ГФК ВАРДАР Неготино ➖ | 4 | 1 | 0 | 3 | 5 | 14 | -9 | 3 |
| 15 | ФК ПОБЕДА АД ➖ | 4 | 0 | 1 | 3 | 4 | 12 | -8 | 1 |
| 16 | ФК ГОЛЕМО КОЊАРИ ➖ | 4 | 0 | 0 | 4 | 2 | 20 | -18 | 0 |
