Македонската фудбалска репрезентација до 18 години славеше минимално со 1:0 против селекцијата на Индонезија во пријателскиот натпревар одигран во Банско, Бугарија.
Нашите млади фудбалери од самиот почеток ја наметнаа својата игра и креираа неколку добри прилики. Најпрво Габриел Талевски се обиде во 30. минута со удар од 18 метри, но индонезискиот голман реагираше сигурно. Само неколку минути подоцна, по мешаница во противничкиот шеснаесетник, најснаодлив беше Иван Танчев кој ја испрати топката во мрежата за водство од 1:0.
Во второто полувреме Македонија продолжи со офанзивен пристап и неколку обиди за зголемување на предноста. Најблиску до гол беше Давид Ангелески во 55. минута со силен удар од 25 метри, кој замина малку над пречката. Иако создадоа уште неколку полушанси, „црвено-жолтите“ не успеаја да реализираат, па резултатот остана непроменет до крајот.
Селекторот Димитар Капинковски го искористи контролниот меч за да им даде минутажа на сите повикани фудбалери, правејќи повеќе измени во второто полувреме.
Македонија следниот тест ќе го одигра на 17 септември на тренинг-центарот „Петар Милошевски“ во Скопје против селекцијата на Унгарија.
За Македонија играа:
Дарко Јовчев, Павел Марковски, Мухамед Мустафи, Андреј Димовски, Матео Кесиќ, Давид Ангелески (капитен), Иван Танчев, Габриел Талевски, Стефан Бранковски, Матеј Сејменов, Дамјан Буцевски.
Влегоа уште: Александар Трајков, Стефан Стаматовски, Стефан Секирски, Рочи Албан, Бојан Велков, Стефан Бујаровски, Јован Мрмачковски, Душан Заев, Флори Иљази, Иво Марковски, Мартин Ѓоргиев, Флоран Османи.
