Ракометарите на Вардар 1961 на најдобар можен начин ја започнаа новата сезона во македонската Суперлига, откако на гостувањето кај Струга славеа убедлива победа со 38-25 (20-12).
По поразот во Суперкупот од Еурофарм Пелистер, избраниците на Иван Чупиќ брзо се консолидираа и покажаа дека остануваат главен фаворит за титулата. Иако настапија без неколку клучни играчи – Гоце Георгиевски, Јака Малус, Махамаду Кеита, Милош Валах и Вуко Борозан – вардарци доминираа од почеток до крај.
Домашните имаа минимално водство од 4-3 во 7. минута, но потоа „црвено-црните“ ја презедоа целосно контролата. Со брзи транзиции и сигурна реализација, Вардар ја зголемуваше предноста и на полувреме замина со комотни 20-12. Во второто полувреме гостите уште повеќе ја зголемуваа предноста, стигнувајќи и до плус 12 во 45. минута (30-18), а до крајот рутински го приведоа мечот кон убедлива победа.
Харуки Кавада, јапонското летно засилување, повторно се истакна како најопасно оружје на Вардар, завршувајќи со 9 погодоци од 11 обиди. Во листата на стрелците се впишаа уште десет ракометари на Вардар, што ја потврдува ширината на ростерот. Кај домаќините, Стефан Атанасовски беше најдобар поединец со 7 голови.
Со оваа победа Вардар ја најави сериозната борба за нова шампионска титула, додека Струга ќе се фокусира на главната цел – обезбедување опстанок и освојување што е можно повеќе бодови во регуларниот дел од сезоната.
