Фудбалскиот клуб Кул од 6 до 8 септември 2025 година ќе биде домаќин на осмото издание на традиционалниот меѓународен турнир „КУЛ КУП“, кој ќе се одржи на терените на стадионот „Цементарница“ во Скопје.
Овој престижен турнир годинава ќе собере 64 младински екипи и над 850 учесници од Македонија, Србија и Хрватска, кои ќе се натпреваруваат во генерации 2014, 2015, 2016 и 2017. Очекувањата се дека посетеноста ќе биде на исклучително високо ниво, со повеќе од 3000 љубители на фудбалот.
Натпреварите ќе се играат на терени со природна трева, а организацијата ќе биде на врвно ниво. За најдобрите екипи се обезбедени пехари, медали и дипломи, а секое дете ќе добие вода и кондиторски производи по завршувањето на секој меч.
На турнирот ќе учествуваат бројни познати клубови, меѓу кои се:
ФК Партизан, ФК Осјек, ФК Македонија ЃП, ФК Шкупи, ФК Работнички, Академија Пандев Јуниор, како и уште многу домашни и странски екипи.
Годинава, по првпат, Спортска Мрежа ќе биде медиумски покровител на турнирот, со што љубителите на младинскиот фудбал ќе имаат можност да ја следат целата атмосфера, резултати и ексклузивни репортажи директно преку нашиот спортски портал.
Со вакви настани, ФК Кул уште еднаш ја потврдува својата посветеност кон развојот на младинскиот фудбал и поттикнувањето на дружењето меѓу младите спортисти од целиот Балкан.
