Младиот фудбалски талент Салим Арифи ја продолжува својата голгетерска форма и во Косово, каде што во дресот на неговиот нов клуб Митровица веќе постигна два гола на самиот старт од новата сезона.
Арифи, кој е родум од Прилеп, важи за еден од најголемите таленти на Победа, со над 100 постигнати голови во сите младински категории на клубот.
Само на 18-годишна возраст, тој веќе се наметнува и во дресот на Митровица, каде што со своите погодоци покажува дека е голем потенцијал и за повисоки нивоа на фудбалот.
Според информациите до кои дојде Спортска Мрежа, неговиот договор содржи и откупна клаузула во висина од 100.000 евра – јасен сигнал дека станува збор за исклучителен талент. Очекувано, клубот од Митровица нема да го пушти лесно, бидејќи Арифи веќе блеска во косовскиот шампионат.
