Младиот македонски тенисер Марко Алексовски го заврши настапот на четвртиот турнир како дел од тимот на ITF–Tennis Europe, проект финансиран од Grand Slam Development Fund. Со своите игри и резултати, Алексовски целосно ја оправда довербата и достојно ја претстави Македонија на меѓународната сцена.
На последниот турнир, одигран во Аликенте, тој стигна до четвртфиналето, каде што дуелот со Португалецот Франциско Сардиња го предаде уште во првиот сет при водство на противникот од 4:1. Причина за тоа беа болките во мускулите предизвикани од напорниот распоред и континуираниот настап без ден за одмор. Инаку, токму пред една недела Алексовски успеа да го совлада истиот противник.
Во конкуренцијата на двојки, заедно со Сардиња, македонскиот тенисер играше полуфинале, но двојката беше поразена од Чесите Ондреј Кацин и Тобиас Запски со 2:0 во сетови (7:5, 6:3), иако во првиот сет имаа предност од 5:3 во гемови.
Алексовски во изминатите четири недели настапи на четири силни турнири за играчи до 14 години:
-
во Германија (турнир од суперкатегорија) стигна до третото коло,
-
во Белгија беше полуфиналист,
-
во Барселона го освои турнирот,
-
а во Аликенте играше четвртфинале.
Со ваквите настапи, Марко Алексовски уште еднаш потврди дека припаѓа на европската тениска сцена и дека Македонија има голем потенцијал во неговиот талент.
