Ракометарите на Нексе Нашице ја забележаа својата прва победа на Меморијалниот турнир „Крсте Андоновски“ во Охрид, совладувајќи го шампионот на Фарските Острови, Киндил Торшавн, со убедливи 28-20. Со овој триумф хрватскиот вицепрвак останува во игра за пласман во финалето, откако во првото коло беше поразен од белградски Партизан.
Натпреварот започна израмнето, а тимот од Фарските Острови успеа да го искористи бавниот старт на Нексе и да поведе во раната фаза. Сепак, по десеттата минута избраниците на Крешо Иванковиќ пронајдоа ритам, влегувајќи во серија од 6-1 и поведоа со 8-5. До крајот на првиот дел, хрватскиот тим ја контролираше играта и на полувреме замина со комотно водство од 15-10.
Во второто полувреме тренерот на Нексе им даде шанса и на играчите со помала минутажа, но тоа не се одрази на резултатот. Квалитетот и поширокиот ростер на хрватскиот тим дојдоа до израз, па предноста постепено се зголемуваше, за на крајот да застане на безбедни 28-20.
Кај Нексе најефикасни беа Тин Лучин и Козина со по четири гола, додека кај Киндил се истакнаа Совсегар со пет и Тисен со четири погодоци.
По оваа победа, хрватскиот вицепрвак останува во игра за првото место во групата, но за тоа ќе му биде потребна победа против домаќинот Охрид и поволен развој на останатите резултати.
Сега на Нексе им следува ден одмор пред, можеби, клучниот натпревар на турнирот – директната пресметка со Охрид за место во финалето.
