Младинската фудбалска репрезентација на Македонија до 16 години славеше сигурна победа од 3:0 против селекцијата на Црна Гора на контролниот натпревар одигран денеска на стадионот „Билјанини извори“ во Охрид.
Избраниците на селекторот Иљами Исејни доминираа во текот на целиот меч и ја наметнаа својата игра уште од првиот свиреж. Во воведните минути, Масев, Ристиќ и Акики имаа одлични прилики за водство, но гостинскиот голман успеа да ги спречи нивните обиди. Сепак, во 39. минута Македонија го скрши отпорот на Црногорците – Адриан Велески со фантастичен продор и прецизен удар донесе водство од 1:0.
Само неколку минути подоцна, Марин Крстевски постигна вистински еврогол и ја зголеми предноста на 2:0 пред заминувањето на одмор.
Во второто полувреме, македонските таленти продолжија со офанзивната игра. По еден час игра, Крстевски беше повторно во центарот на вниманието – овој пат како асистент. Неговиот прецизен пас го пронајде Стефан Ристиќ, кој реализираше за убедливи 3:0.
До крајот на натпреварот, Полимац и Емини имаа уште две одлични шанси, но гостинскиот голман Јанковиќ спречи повисока победа на нашата селекција.
Вториот контролен дуел меѓу овие две селекции е закажан за 21 август со почеток од 11:00 часот, повторно на „Билјанини извори“.
Со ова убедливо издание, македонската селекција U16 уште еднаш покажа дека иднината на фудбалот во земјата има сериозен потенцијал.
