Македонската одбојкарска репрезентација вечерва ја оствари својата цел и со убедлива победа над Грузија обезбеди пласман на четвртото Европско првенство по ред. Во СЦ „Борис Трајковски“, избраниците на селекторот Јошко Миленковски славеа со 3-0 во сетови (25-13, 25-16, 25-17), со што ја потврдија визата за ЕП 2026.
За пласман на шампионатот беше неопходна победа во чисти три сета и позитивна поен-разлика од најмалку седум поени – услов што нашите одбојкари го исполнија без проблем. Македонија доминираше во текот на целиот меч, беше надмоќна во сите елементи на играта и заслужено се чекира на континенталниот собир што ќе се одржи во Бугарија, Финска, Италија и Романија.
Ова ќе биде четврто учество на Македонија на европските шампионати. Во 2019 година завршивме на 17. место, во 2021 на 23. позиција, а во 2023 – кога бевме еден од домаќините – на 16. место. Целта за претстојното првенство е јасна: пласман во втората фаза, што би претставувало историски успех и круна на генерацијата.
Македонија патува на ЕП 2026 како една од петте најдобри второпласирани селекции во квалификациите.
