Во 2. коло од Првата македонска фудбалска лига, екипата на Башкими стигна до првата победа по враќањето во елитата, славејќи со 0-2 на гостувањето кај Работнички, додека шампионот Шкендија со комбиниран состав убедливо го совлада Македонија ЃП во Ѓорче Петров (1-3).
На арената „Тодор Проески“ во Скопје, подмладениот Работнички имаше иницијатива и неколку шанси на стартот, но токму кога делуваше поопасно – следеше казна. Во 36. минута, несреќен автогол на Лука Робакидзе донесе водство за гостите од Куманово. Во второто полувреме Работнички продолжи да притиска, но голманот Амир Јашар блескаше на голот.
Дилемите околу победникот ги реши Ресул Мемети со прекрасен погодок во 78. минута за конечни 0-2. За „романтичарите“ ова е продолжение на лошата серија – без постигнат гол на четири официјални меча.
Во Ѓорче Петров, Шкендија покажа зошто е актуелен шампион. Тетовци уште во 9. минута поведоа преку Фитон Адеми, а потоа домаќинот остана со играч помалку по исклучувањето на Карлос Кабаркас. Со бројчана и резултатска предност, Шкендија рутински го контролираше натпреварот.
Ендрит Красниќи во 54. минута реализираше пенал за 0-2, а Фабрис Тамба во 68. минута зголеми на 0-3. Македонија ЃП во самиот финиш само го ублажи поразот преку искусниот Дарко Глишиќ (1-3).
Со овој триумф, Башкими запиша први бодови по враќањето во лигата, додека Шкендија ја продолжува победничката серија и со две победи во првите две кола ја потврдува фаворитската улога во шампионатот.
