Работнички минатата сезона заврши на високото трето место во Првата лига што му овозможи излез во Европа, играше во квалификациите за Конференциската лига на УЕФА, но беше елиминиран уште во првото коло.
Фокусот сега е на домашното првенство, а сезоната екипата од Дебар Маало ја отвара денес во Кавадарци против Тиквеш.
Капитенот на Работнички, Бесир Демири вели дека знаат оти ги очекува тежок меч во Кавадарци, но дополнува дека се подготвени добро за стартот на новата сезона.
„По настапите во Конференциската лига и елиминацијата, нашите мисли во изминатите дваесетина дена се насочени кон стартот на првенството. Мислам дека сме добро подготвени, но тоа ќе мора да го покажеме и на теренот. Гостувањето во Кавадарци секако е сериозен испит, Тиквеш е квалитетен тим, ова лето и дополнително се засили, а и посебно добро игра пред своите гледачи. Знаеме дека нѐ очекува еден тежок натпревар, но подготвени сме да го дадеме најдоброто од нас и ќе се обидеме да освоиме бодови“ вели новиот капитен на Работнички, Бесир Демири.
Екипата на Работнички сезоната ја започнува со нов шеф на стручниот штаб, Бојан Маркоски.
