Второто коло од претквалификациите за Светското првенство донесе тежок пораз за македонската кошаркарска репрезентација, која загуби од Унгарија со 96-58. Селекторот Марјан Илиевски смета дека ваквата разлика не ја отсликува реалната слика за квалитетот на двете екипи.
„Очекував натпреварот да изгледа малку поинаку, бидејќи мислам дека разликата од 38 поени е претерана во однос на квалитетот на двете репрезентации. Верувам дека нашите кошаркари преголемо ги респектираа Унгарците, и токму тука треба да ги бараме причините за поразот.Одигравме добра една четвртина, но противникот беше исклучително расположен за шут. Погодија 15 тројки со 40% успешност од дистанца. Унгарската екипа има квалитет и денеска беше многу мотивирана да победи пред своите навивачи, кои им пружија голема поддршка.Задоволен сум од настапот на младите кошаркари и верувам дека во иднина ќе играме значително подобро. Сепак, ни останува постојано да се подобруваме во секој поглед. Верувам дека ќе се надградуваме, но мора да внимаваме – кога резултатот оди во негативна насока, не смееме да бараме брзи решенија, бидејќи тоа само ја продлабочува кризата. Јас им давам целосна поддршка на играчите, тие даваат максимум, но јасно е дека сè уште ни недостасува искуство. Сепак, тоа е реалноста со која се соочуваме, а искуството е нешто што засега го немаме,“ изјави Илиевски по мечот во Солнок.
Пред македонските кошаркари сè уште остануваат два натпревари во претквалификациите за Светското првенство, а најклучен од нив е следниот дуел против Романија, кој ќе се игра на 13 август во Орадеа.
Овој натпревар ќе биде важна проверка за нашиот тим, кој има обврска да покаже подобра игра и да се врати на победничкиот пат по неодамнешниот тежок пораз од Унгарија. Селекторот Марјан Илиевски истакна дека е потребно максимално вложување и концентрација за да се искористи шансата за напредок во групата и да се зачуваат надежите за пласман во следната фаза.
Македонските кошаркари ќе мора да ги исправат грешките од претходните натпревари и да прикажат енергична и храбра игра, особено во одбраната, каде што им беше најголем предизвик против силните противници досега.
Поддршката од навивачите и мотивацијата на играчите ќе бидат клучни за успешен резултат во Орадеа.
