Успешно заврши 25-тото издание на меморијалниот турнир „Влатко Петров 2025“, кој се игра во штипската населба Чардаклија. На финалниот ден пред многу публика се одиграа квалитетни натпревари за успешно затварање на овогодинешното издание на овој меморијален турнир кој се игра во чест на Влатко Петров, кој загина на 3 мај во воениот конфликт во 2001 година во Ваксинце, кумановско.
Во големото финале екипата на Агросмарт буквално го торпедираше тимот на Le Mans со превисоки и недостижни 9:3.
Ова е прв титула за тимот на Агросмарт на „Влатко Петров“, а тимот кој од почеток беше меѓу главните фаворити за титулата, истата ја оправда.
Во натпреварот за третото место екипата на Штерјов Credy со 5:1 убедливо го доби БР Сашо ГИС.
За најдобар играч на турнирот е прогласен Мики Митров, за најдобар голман Иван Стојаноски – Шваба, а најдобар стрелец е Тале Трајковски.
Организаторот додели и награда за фер-плеј екипа, која ја доби екипата на Благица Kitchen.
„Како организационен одбор се извинуваме доколку имаше одредени пропусти иако тежнеевме се да биде совршено и максимално регуларно. Благодарност до сите екипи без исклучок кои беа учесници на турнирот. За следната година најавуваме уште посилна организација во подобар амбиет за игра со изградбата на трибината која што веќе е договорена и со која ќе се заокружи една целина“, велат организаторите на турнирот.
Спортска Мрежа и оваа година медиумски го поддржа овој турнир, а нашата соработка започна уште во 2022 година.
