Македонскиот младински репрезентативец Никола Величковски е нов фудбалер на Брера Струмица. 19-годишниот офанзивец пристигнува од бугарскиот тим Септември Софија и веќе се приклучи на подготовките на струмичани за новата сезона во Првата македонска фудбалска лига.
Величковски претставува значајно засилување за струмичкиот прволигаш, со оглед на неговото искуство и флексибилност во офанзивната линија. Својата кариера ја започна во редовите на Вардар, по што следеа настапи за Работнички и Македонија ЃП, а во младинските селекции на Македонија има повеќе од 20 настапи и пет постигнати голови. Тој важи за еден од столбовите на репрезентацијата до 21 година.
Од клубот порачуваат дека од Величковски очекуваат да биде клучна алка во офанзивата на тимот, а своето деби во новиот дрес би можел да го има уште во првото коло, кога Брера гостува кај Силекс во Кратово.
