Месец август ќе биде целосно во знакот на младинскиот тенис, откако Скопје ќе биде домаќин на четири меѓународни турнири за тенисери и тенисерки во младинска конкуренција. Станува збор за два турнири од рангот J60 и два од рангот J30 во календарот на ITF (Меѓународната тениска федерација).
Првиот турнир веќе започна со квалификациите, а главната програма ќе се одигра од 4 до 10 август. Станува збор за J60 Neocom Open 2025, кој ќе се игра на терените на ТК Југ во Градскиот парк во Скопје. Непосредно по него, од 11 до 17 август, ќе се одржи и вториот турнир од истиот ранг, J60 Jug Open 2025, повторно на терените на ТК Југ.
Од 18 до 24 август ќе се одржи првиот турнир од рангот J30 – Inteko Open 2025, исто така на терените на ТК Југ. Последниот, четврти по ред, ќе биде Pointer Tennis Park Open 2025, кој ќе се игра на терените на ТК Поинтер од 25 до 31 август.
Овие турнири претставуваат значајна можност за младите македонски тенисери и тенисерки да се натпреваруваат на меѓународно ниво, да освојат вредни поени и да стекнат искуство на домашен терен.
