Струга Трим Лум континуирано гради тим не само за сегашноста, туку и за иднината. По неколкуте засилувања со искусни фудбалери од странство, клубот направи нов важен чекор, потпишувајќи професионални договори со двајцата талентирани стружани – Албан и Флориан Рочи.
Клубот силно верува во потенцијалот на овие двајца фудбалери, кои се гледаат како значаен дел од иднината на Струга Трим Лум. Поради тоа договорите се долгорочни, со цел да им се даде можност да созреваат и напредуваат токму во клубот на својот роден град.
Албан Рочи има 17 години и е роден во Струга. Последните две години беше дел од младинските категории на АП Брера, каде што успеа да освои неколку трофеи. Игра на позицијата десен бек, а неговиот талент и квалитет наскоро ќе бидат ставени во функција под водство на тренерот Бледи Шкемби. Албан своите први фудбалски чекори ги направи во младинските категории на ГФК Охрид, исто како и неговиот братучед, Флориан.
Флориан Рочи е 18-годишен, исто така роден во Струга. И тој, како Албан, изминатите две години ги помина во АП Брера, каде што освои значајни трофеи во младинската конкуренција. Пораснат и поспремен, Флориан сега ја гледа својата шанса да се наметне во сениорскиот тим. Тој игра како десно крило.
И двајцата млади таленти се дел и од младинските репрезентации на Македонија – Албан настапува за У17 селекцијата, додека Флориан за У18.
