По жестока и драматична групна фаза, а потоа и елиминациски мечеви исполнети со изненадувања и страст – време е за четвртфиналето на Меморијалниот турнир во мал фудбал „Благој Истатов 2025“ во Струмица.
Натпреварите што следат ќе бидат вистински пресметки за фудбалски престиж, билет за полуфинале и нова шанса за влез во историјата на турнирот. Теренот е подготвен, фаворитите се под притисок, а публиката – повеќе од подготвена.
Четвртфинале – Недела, 6 јули
21:30 | ФК Дрвош – Украс ИНГ
Разиграниот ФК Дрвош, кој го елиминираше Фенербахче, ќе се соочи со стабилниот Украс ИНГ, кој зад себе има победа против Компанија Атанасовски. Очекуваме силен дуел со многу тактика и темпо.
22:30 | Гостилница кај Џек – Пица ресторан Дивино (Босилово)
Без дилема, дербито на вечерта. Две екипи кои играат атрактивен и ефикасен фудбал, со силни поединци и навивачка поддршка. Натпревар без право на грешка, каде ќе решаваат детали.
Четвртфинале – Понеделник, 7 јули
21:30 | Еклектик – Але Дар Премиум
Еклектик пристигна во четвртфиналето со стил – по убедливи 7:1 над Евро Тип, но против себе ќе го има незгодниот Але Дар Премиум, кој го елиминираше Агро Смарт и најавува нова сензација.
22:30 | Freight One – Хотел Истатов
Вистинско пеколно дерби за крајот на четвртфиналето. Freight One со доминантна игра во осминафиналето, но и Хотел Истатов беше сигурен со победа од 3:1 над Еклер Транс. Натпревар кој ветува фудбалско шоу и тензична завршница.
Сите натпревари се играат на спортскиот терен во Чифлик Маало, каде атмосферата станува сè погласна, а битката за полуфинале – пожестока.
Следете го турнирот ексклузивно на Спортска Мрежа, каде ќе најдете резултати, анализи, фотографии, видеа и многу повеќе – директно од терен!
