Работнички и Силекс повторно ќе се сретнат на пријателски натпревар во рамки на летните подготовки, при што овој дуел ќе донесе значаен новитет. За првпат на контролен меч меѓу македонски клубови ќе се користи ВАР технологијата.
Натпреварот е закажан за Среда (2 јули), со почеток во 18:30 часот, и ќе се одигра на тренинг-комплексот на Фудбалската федерација на Македонија. Ова ќе биде трет контролен натпревар помеѓу двата тима во краток период, по претходните две средби кои завршија без победник 0:0 и 1:1.
И Работнички и Силекс се активно подготвуваат за настапите во квалификациите за Конференциската лига, па ваквите пријателски натпревари се од голема важност за тестирање на формата пред европските предизвици.
Имплементацијата на ВАР технологијата на оваа средба претставува чекор напред во модернизацијата на фудбалската инфраструктура и судиските услови во Македонија. Натпреварот ќе биде искористен и како практична вежба за ВАР тимот, со цел подобра подготовка за официјалните средби каде системот ќе биде задолжителен.
