Градот Берово повторно ќе биде центар на спортската мапа на Македонија, бидејќи од 12 до 14 септември 2025 година, во Спортскиот центар „Македонски Бранители“, ќе се одржи четвртото издание на меѓународниот турнир во пинг-понг – „Зегин Опен 2025“.
Овој престижен турнир, кој веќе станува традиција не само во источниот регион, туку во цела Македонија е во организација на ППК Зегин Берово, и очекува учество на врвни играчи од Македонија и странство.
Минатата година турнирот беше збогатен со присуството на хрватската олимпијка Ивана Малобавиќ, која важи за една од најдобрите европски пинг-понгарки. Оваа година се очекуваат уште повеќе медалисти и елитни играчи, кои ќе се борат за богат награден фонд од 18.000 евра.
Турнирот е отворен за публика, па сите љубители на тенисот на маса ќе имаат можност да уживаат во три дена исполнети со спортска страст, фер-плеј и квалитетни натпревари.
По успешната медиумска покриеност во 2024 година, Спортска Мрежа со гордост ја продолжува соработката со турнирот и оваа година, со цел да ја промовира спортската култура, младите таленти и меѓународната спортска соработка.
Во продолжение можете да ја погледнете нашата емисија за „Зегин Опен 2024“, да се потсетиме на одличната атмосфера од минатата година и заеднички да се загреваме за овогодинешното издание „Зегин Опен 2025“.
