Новиот прволигаш Арсими за новата сезона информираше дека е продолжена соработката со најголем дел од фудбалери со кои минатата сезона тимот од Чегране испиша историја – пласирајќи се по првпат во фудбалската елита на Македонија.
Арсими ја продолжи соработката со голманот Вулнет Ислами, Ајрадин Цуцули, Мухедин Дардишта, потоа со бекот Џезаир Авдули кој одбил други понуди за да остане верен на „жолто-црниот“ дрес, Арџент Гафури, талентот играч од среден ред Суби Мустафа и искусниот играч за врска Малик Белули.
Во нападот и натаму останува искусниот Шпенд Асани, перспективниот Албан Таипи и најдобриот стрелец на Арсими и во Втората лига, Албин Рамадани.
Со продолжувањето на договори на овие играчи Арсими потврдува дека ќе има амбиции во Првата лига, а секако дека главната цел ќе биде директен и сигурен опстанок и што повисок пласман на прволигашката табела.
Дебитантот во Првата лига подготовките ќе ги започне на 1 јули, а втората фаза од подготовките ќе се реализира во Охрид. Според информациите на Спортска Мрежа во следниот период ќе бидат претставени и првите засилувања во Арсими.
Тука исто би додале дека Спортска Мрежа најавуваше дека Арсими ќе биде дел од елитата уште пред неколку сезони кога клубот беше дел од Трета лига – Запад, многумина тогаш не веруваа во тој проект, но анализите на Спортска Мрежа се потврдија, Арсими сега е дел од елитата.
