Екипата на РК Младост 1977 од Богданци продолжува со засилувањата за новата сезона и амбициозната цел – пласман во Суперлигата. Трето ново име во тимот е ракометарот Даниел Андоновски, кој доаѓа од суперлигашот ГРК Тиквеш од Кавадарци.
Андоновски е 23-годишен ракометар кој настапува на левата бековска позиција, висок е 192 сантиметри и важи за физички доминантен и искусен играч. Освен настапите во македонската Суперлига, зад себе има и меѓународно искуство играјќи за неколку европски клубови, што го прави исклучително значајно засилување за тимот од Богданци.
Договорот е најмалку на една година, а од него се очекува да биде еден од носечките играчи во сезоната што следи, во која РК Младост 1977 ќе атакува на самиот врв и директен влез во елитното друштво на македонскиот ракомет.
Клубот му посака добредојде на новиот член, кој наскоро ќе му се приклучи на тимот на подготовки.
Претходно, екипата се засили со младиот Гоце Аргиров и искусниот Србин Лазар Адамовиќ, а за нов тренер беше претставен Горан Андоновски.
