Македонскиот репрезентативец Бобан Николов повеќе не е фудбалер на Борац Бања Лука. Клубот од Босна и Херцеговина преку своите официјални канали потврди дека соработката со Николов е завршена.
Искусниот играч за врска имаше договор до крајот на сезоната и по неговото истекување не постигна нов договор со клубот, па ќе ја продолжи кариерата во нова средина.
Во изминатата сезона, Николов одигра 41 натпревар во сите натпреварувања и забележа три асистенции. Со својата стабилност и искуство беше важен дел од тимот на Борац.
Во текот на кариерата, 29-годишниот фудбалер настапуваше за неколку клубови ширум Европа, меѓу кои Лече (Италија), Шериф (Молдавија), Кишварда (Унгарија), Вардар (Македонија), и други. Сега е слободен играч и во потрага по нов предизвик.
