Ракометарите на Радовиш запишаа значајна победа на гостувањето кај Струга, откако во натпревар од 8. коло на плеј-аутот, радовишани славеа со 26:28.
Со оваа победа, тимот на Радовиш е чекор поблиску до директен опстанок во ракометната елита на Македонија. Овој триумф доаѓа по заминувањето на тренерот Игор Котевски, а тимот настапи и без Лазар Адамовиќ.
На клупата беа двајцата млади тренери Спасе Ѓоргиев и Александар Долдуров, кои минатата сезона испишаа историја откако преку баражот го победија Еурофарм Пелистер 2 и експресно го вратија Радовиш во Суперлигата. Сега, клубот е пред нов подвиг – директен опстанок.
Струга имаше водство од 14:12 на полувремето, но во вториот дел Радовиш најпрво израмни, а потоа и го сврте резултатот со добра игра во своја корист.
Најефикасен кај Струга беше Богдан Мујишковиќ со осум гола, додека кај Радовиш се истакна Здравко Постолов со шест погодоци.
