По одигрувањето на сите натпревари од групната фаза и ден за пауза, фудбалскиот турнир во Враништа продолжува со највозбудливиот дел – елиминациите! Осминафиналето е закажано да започне денес, а најдобрите 16 екипи ќе се борат за место во четвртфиналето. Атмосферата се загрева, а теренот во Враништа е подготвен за нови фудбалски пресметки.
Според распоредот, во првото осминафинале ќе се сретнат фаворизираните Аце Најдески и Јован 2014, а веднаш потоа следуваат две интересни средби: Студио 13 – Виена Комерц и Би-Зи Груп – Кафе Бар 9. Сите три натпревари ќе се одиграат во недела, со почеток во 20:00, 21:00 и 22:00 часот.
Нокаут фазата продолжува во понеделник, 26 мај, кога на терен ќе излезат:
-
Инекс Олгица против Кафе Линди,
-
Бел Мерцедес против Том Гор,
-
и Гостилница Кај Мече против Станица и Викса Пром.
Во вторник, 27 мај, ќе се одиграат последните две осминафинални средби:
-
АСП Пак – М.М. Транс (20:30),
-
и Сатеска – Чардак Велгошти (21:30).
Натпреварите ветуваат неизвесност, борба до последен свиреж и големи емоции. Тимовите кои обезбедија пласман во елиминациите покажаа квалитет во групната фаза, но од овој момент натаму, секоја грешка може да биде кобна. Сите дуели се играат по системот на директна елиминација – победникот продолжува, поразениот се збогува.
Организаторите најавуваат одлична организација, фер-плеј и уште една спортска фешта во Враништа. Публиката, како и досега, се очекува да биде бројна и гласна, со силна поддршка за омилените екипи.
Натпреварите се играат на теренот во Враништа, а сите љубители на фудбалот се поканети да присуствуваат и да бидат дел од оваа спортска приказна!
Спортска Мрежа е медиумски покровител на овој спортски настан.
