Екипата на Брера Струмица со победа над Работнички од 3-2 обезбеди директен опстанок и за следната сезона на ПМФЛ. Стрелци на головите за Брера беа Ндзенге, Велков и Мартин Ѓорѓиевски, додека за Работнички погодија Лазаревиќ и Николовски.
И покрај победата над Пелистер во Битола од 1-4, тимот на Беса од Добри Дол ќе мора да игра бараж за опстанок. Головите за гостите ги постигнаа Алими, Селмани, Љамалари и Али, а за Пелистер стрелец беше Тарасенко.
Во исто време, Воска Спорт и Гостивар се административно исфрлени од Првата лига и нема да бидат дел од следната сезона.
Шкендија со титула, Силекс и Работнички обезбедија Европа
Иако Шкендија загуби од Силекс со 1-3 на домашен терен, тимот од Тетово ја прослави својата петта шампионска титула. За Силекс стрелци беа Марко Ѓорѓиевски со два гола и Тимовски, додека Адеми го постигна единствениот гол за домаќините.
Со оваа победа, Силекс го освои второто место и ќе игра во квалификациите на Конференциската лига на УЕФА заедно со Работнички.
Тиквеш и Струга ремизираа во возбудлив натпревар
Највозбудлив меч од последното коло го одиграа Тиквеш и Струга Трим Лум, откако ремизираа играјќи 3-3. За Тиквеш погодија Стојанов, Миловановиќ и Михајлевиќ, додека за Струга стрелци беа Компаоре и Малески кој даде два гола.
Струга сезоната ја заврши на четвртата позиција, а Тиквеш обезбеди опстанок како осмопласиран.
