Македонскиот репрезентативец Димитар Митровски ја игра најдобрата сезона во својата кариера. Со одличните настапи во дресот на Вараждин, тој заслужено се најде во трката за најдобар фудбалер на сезоната во хрватскиот шампионат.
На две кола пред крајот на првенството, ХНЛ (Хрватска фудбалска лига) ги објави номинациите за најдобар играч на сезоната. Изненадувачки, меѓу номинираните нема ниту еден фудбалер од хрватскиот гигант Динамо Загреб. Како главен фаворит за наградата се истакнува Марко Ливаја од Хајдук, кој досега има постигнато 18 голови и 9 асистенции.
Митровски е најдобар стрелец на Вараждин со 7 голови и 1 асистенција, што го позиционира меѓу најистакнатите играчи во лигата. Покрај него и Ливаја, во потесниот круг за наградата се најдоа и Тони Фрук (Ријека), Ален Гргиќ (Славен Белупо) и Роберт Мудражија (Локомотива).
Виолета Јанчева, Спортска Мрежа
