Во чест на јубилејниот 100-годишен роденден, Фудбалскиот клуб Овче Поле (1925–2025) организира голем Фестивал на фудбалот, кој ќе се одржи на 17 и 18 мај 2025 година на Градскиот стадион во Свети Николе.
Како увертира во одбележувањето на вековното постоење на клубот, ФК Овче Поле ќе биде домаќин на завршниот турнир за најдобрите екипи од Централниот регион на Македонија, со учество на 34 екипи и повеќе од 500 млади фудбалери родени помеѓу 2012 и 2017 година.
Натпреварите ќе започнуваат во 08:00 часот, а ќе траат до 16:00 часот, при што се очекува богат спортски викенд исполнет со младински натпревари, фер-плеј дух и голема поддршка од трибините.
ФК Овче Поле ќе настапи во две возрасни категории – генерациите 2015 и 2016 година, со надеж за уште еден силен настап на домашен терен и промоција на своите млади таленти.
Клубот испраќа јавен повик до сите љубители на фудбалот и спортот:
„Да бидеме заедно дел од овој незаборавен момент, да ги бодриме нашите мали херои и да им дадеме несебична поддршка на идните професионалци!“
Настанот е и одлична можност за дружење, спортска мотивација и прослава на спортскиот дух кој 100 години живее во срцето на Свети Николе – преку ФК Овче Поле.
Свети Николе и ФК Овче Поле се домаќини на групата А, па така во сабота ќе играат непарните генерации односно 2013, 2015 и 2017, додека пак во недела ќе играат парните генерации односно 2012, 2014 и 2016.
Најдобрите екипи од сите генерации ќе обезбедат „виза“ за завршниот турнир кој се игра во Скопје во период од 30 мај до 1 јуни.
