Екипата на Баскет Кам направи силен чекор кон одбрана на шампионската титула во женскиот кошаркарски шампионат, совладувајќи ја екипата на Крива Паланка со убедливи 66:47 во првиот натпревар од финалната серија на плеј-офот.
Домаќинките од Македонска Каменица одиграа доминантна последна четвртина, во која направија серија од 15-0 и целосно ги урнаа надежите на гостинскиот состав за евентуално изненадување.
Натпреварот започна со водство на Баскет Кам од 23:17, но до крајот на првото полувреме, Крива Паланка возврати со своја серија и резултатот беше израмнет на 28:28.
Во третата четвртина, актуелниот шампион се одвои на 48:40, но гостинките се вратија на само четири поени негатива на почетокот на последниот период (47:51). Тогаш следуваше клучната серија на Баскет Кам, која обезбеди победа и водство од 1-0 во финалната серија.
Најефикасна во победничкиот тим беше Кметовска со 27 поени, а Димова постигна 24. Добар придонес даде и Максимовска со 8 поени.
Кај Крива Паланка, Робинсон реализираше 13, Меклејни 12, а Ѓоргиевска постигна 10 поени.
Вториот меч од финалето ќе се одигра повторно во Македонска Каменица, во текот на викендот.
