Кошаркарскиот клуб Маџари ќе игра во Првата лига следната сезона, откако и во вториот натпревар од полуфиналната плеј-оф серија беше поуспешен од тимот на МЗТ Скопје Уни Банка. Во салата „Јане Сандански“, Маџари славеше со убедливи 78:55, со што ја завери серијата со 2-0 и испиша историски пласман во елитата.
Најзаслужен за победата беше Димчевски со 17 поени, следен од Димитровски со 14 и Митков со 13. На спротивната страна, капитенот на МЗТ Уни Банка, Ангеловски, реализираше впечатливи 25 поени, но тоа не беше доволно за да се спречи елиминацијата на младиот тим.
Во вториот полуфинален меч од вечерта, одигран во Штип, Соколи 1933 се избори за одлучувачки трет натпревар против тимот на Ангели, совладувајќи ги со 80:71 и израмнувајќи ја серијата на 1-1.
Штипјани беа предводени од капитенот Караколев со 25 поени, додека Костадинов и Митев додадоа 19, односно 13 поени. Кај Ангели, Стојанов постигна 22 поени, Богатиновски 13, а Атанасов 12.
Третиот и решавачки натпревар – „мајсторката“ – ќе се одигра викендов во салата „Независна Македонија“ во Скопје, каде што Ангели ќе биде домаќин и ќе се одлучи кој ќе го заземе второто место што води во Првата лига.
