Екипата на Големо Коњари со убедливи 10:1 го декласираше тимот на Влазними Јуниор во рамки на претпоследното 25. коло на Трета лига – Југ со што тимот стана и официјално шампион.
Следуваше голема прослава со публиката, навивачите и поддржувачите на клубот, со што сега Големо Коњари се насочува кон баражот за влез во Втора лига.
Денес Големо Коњари го одигра последниот меч на домашен терен, со надеж дека следниот ќе го одигра како второлигаш.
Во меч на тотална доминација шампионот Големо Коњари со убедливи 10:1 го декласираше Влазними Јуниор. Беким Алимоски постигна четири погодоци, хет-трик за Ерџан Ибраимоски, а по еден гол постигнаа Јованче Сугарески, Христијан Кукески и Филип Кукески. За гостинската екипа единствен стрелец беше Мевлан Усеиноски кој погоди во 38. минута.
Погледнете каква беше атмосферата на теренот во Големо Коњари по завршување на мечот и прославата за шампионската титула. На 18 мај во Големо Коњари ќе има голема прослава за титулата, клубот веќе организира и маички со шампионскиот натпис за сите навивачи, за што веќе информираше Спортска Мрежа.
Во Крушево немаше победник реми на Питу Гули и Дреново играјќи 2:2. Домаќинот имаше водство од 1:0 на полувреме со голот на Оливер Велевски, а во вториот дел гостинот преку Армен Мемедов и Роналдо Фазлиов дојде до пресврт и водство од 1:2. Во 81. минута од натпреварот Соте Волчески ги постави конечните 2:2.
Немаше победник ниту во Долни Дисан каде исто така беа постигнати четири гола за 2:2 меѓу Венец и Башкими 2008. Горан Цветков во 4. минута погоди за 1:0, а по една минута Аљбин Јашари постигна гол за 1:1. Потоа мрежите мируваа се до самиот финишот кога Вергим Јајов постигна гол за нова предност на гостинот од 1:2, а во 90. минута Дарио Шишков погоди и обезбеди бод за неговиот тим.
Екипата на Превалец го забележа првиот пролетен пораз откако во Кривогаштани загуби со 2:1 од тимот на Младост. Гостинот одигра натпревар со многу цврста игра, но поразот и не вистински приказ на играта во поле.
Домашниот тим преку Димитар Китаноски го отвори мечот, а пак Александар Чешелковски погоди во 42. минута за 2:0 на полувреме. Во вториот дел веднаш гол постигна Превалец преку Сашко Кочов и така се обидуваше да дојде и до бодови, но сепак на крај го доживеа првиот пролетен пораз.
Поранешниот второлигаш Росоман на домашен терен дојде до убедлива победа од 6:2 над Бучин. Во првиот дел резултатот беше 3:1, откако Слободен Дуков постигна гол за 1:0 во 8. минута од мечот. Даниел Шопески во 19. минута израмни на 1:1, а потоа брзо Росоман дојде до 3:1 преку Желимир Трикиќ и Тоше Кочовски.
Во вториот дел од мечот Шопески со втор гол намали на 3:2, а до крајот два гола за домашниот тим постигна Кире Димков и еден гол Бојан Миланов за конечни 6:2.
Слободни екипи во рамки на претпоследното 25. коло беа Ултрас и Слога од Лажани.
