Во духот на солидарноста и човечноста, во организација на Јавното претпријатие „Билјанини Извори“ и СОСУ „Св. Кирил и Методиј“ од Охрид, беше организирана хуманитарна трка посветена на жртвите и повредените од трагичниот настан во Кочани.
Настанот собра бројни учесници – спортисти, ученици и граѓани – кои преку спортската активност упатија порака на поддршка, сочувство и заедништво со семејствата кои беа најтешко погодени од трагедијата.
Трката не беше само спортско надмудрување, туку чин на човечка блискост. Со секој изминат метар, учесниците симболично го носеа товарот на солидарноста, испраќајќи јасна порака: Охрид е со Кочани – во мислите, во срцето и во делото.
Оваа иницијатива претставува пример за тоа како спортот може да биде алатка за обединување и изразување на емпатија во најтешки мигови. Хуманитарната трка во Охрид уште еднаш потврди дека вистинските вредности блескаат најсилно токму кога е најтешко и тоа преку спортот.
