Лидерот Шкендија од Арачиново го доживеа првиот пораз оваа сезона откако на гостински терен загуби со минимални 1:0 од Риниа, а овој минимален триумф за домашниот тим е повеќе од добредојден во битката за опстанок во Трета лига – Север.
Домашниот тим го слави Елмедин Арифи, кој беше стрелец во 65. минута од мечот. Мора да потенцираме дека Шкендија Арачиново играше со втор состав, дел од играчите имале повреди, а дел поради вируси, но и шанса да им се даде простор и на младите играчи, секако Шкендија е веќе во баражот за Втора лига.
Башкими Љуботен и Академија Илиден ремизираа без голови (0:0), а реми без голови одиграа и Кадино и Пчиња во борбата за опстанок.
Фортуна со голот на Алтин Сефо со минимални 1:0 го доби БВК Коњаре, а пак Куманово преку Масески и Јовановски со погодоци во вториот дел го доби некогашниот прволигаш Еуромилк ГЛ со резултат од 0:2 на гостински терен.
Ржаничино забележа пбоеда од 2:1 над последнопласираниот Њу Старс. Домашниот тим преку Миленковски и Лазев дојде до водство од 2:0, а во 44. минута Стефан Стојановски погоди за конечните 2:1.
Најмногу голови имаше во Доброшане каде Беса од Слупчане со 4:2 го доби Аеродром. Мерван Фетаи беше стрелец на три гола за домаќинот, а еден гол постигна Бајрами. За гостинот стрелци беа Наумовски во првиот дел и Томовски во вториот дел.
