Новиот шампион во Трета лига – Исток, Слога Виница со убедливи 13:0 го декласираше во секој сегмент на фудбалската игра Ударник од Пирава, а во рамки на денешното 15. коло.
Разликата во квалитет е огромна и повеќе од јасна беше високата победа, но треба да се потенцира дека гостинот од Пирава допатува со само двајца фудбалерки на клупата за резерви, па и тоа дополнително влијаеше на високиот пораз.
Искусниот Филип Петковски го водеше шампионот од Виница со четири гола, по два гола постигнаа Тони Мирчевски, Игор Ѓорѓев и Октај Амедов, додека пак по еен гол постигаа Филип Николовски, Александар Илиев и Иван Настески – популарниот Меси.
Натпреварот во Берово меѓу Малеш и Овче Поле заврши без победник, но и без погодоци (0:0) за поделба на бодовите.
Трите бодови останаа во Делчево, Брегалница го слави Филип Димитровски, кој беше стрелец на единствениот победнички гол постигна во 82. минута за минимална победа од 1:0 над Дојранско Езеро.
Тиверија во судиското надополнување дојде до бод против Карбинци откако на домашен терен ремизираше играјќи 2:2. Гостинот имаше предност од два гола откако истите ги постигна Никола Илиевски, во 5. минута за водство од 0:1 на полувреме и во 53. минута за 0:2.
Во 74. минута Ване Новков постигна гол за 1:2, а во 91. минута Борче Коцев покажа на белата точка за домашниот тим и одново Новков беше сигурен од белата точка за конечните 2:2.
Главниот судија Борче Коцев подели два жолти картони кај Тиверија еден на Андон Шилинов во 42. минута и на Илија Панов од раководството на домашниот тим. Додека пак кај гостинскиот тим беа доделени пет жолти картони, а на кондициониот тренер Ладе Николов му беше доделен директен црвен картон во 93. минута поради дискриминаторско однесување, така е наведена причината за доделување на црвениот картон.
Натпреварот во Зрновци меѓу Светлост и некогашниот прволигаш Хоризонт Турново не го дочека својот крај откако истиот беше прекина во 76. минута при резултат од 2:2. Ристе Лазаров во 12. минута постигна гол за 1:0, а десет минути подоцна Васко Коцев погоди за 1:1.
Во самиот финиш на првиот дел односно во 44. минута Стефан Стефановски постигна гол за 2:1 на полувреме.
Во вториот дел гостинот од Турново дојде до израмнување, откако во 56. минута искусниот Сашко Пандев постигна гол за 2:2.
Натпреварот бил прекинат во 76. минута. Како што е наведено во делот за примедби од делегатот причината за прекин е физички напад од страна на гостински играч врз вториот помошен судија.
„Натпреварот одигран по правила и пропозиции на ФФМ. Во 76 мин. натпреварот беше прекинат поради физички напад на вториот помошен судија од играчот со бр.19 од ФК Хоризонт Турново АД. Следува дополнителен извештај од сите службени лица во определениот временски рок“, е заведено во записникот од мечот.
Овој случај е потврден и од страна на полицијата.
„На 18.04.2025 во 20.10 часот во ОВР Кочани И.Ф.(46) од Штип пријавил дека во с.Зрновци, кочанско, на фудбалски натпревар на кој бил судија, најпрвин вербално, а потоа и физички бил нападнат од С.П. од Струмица. Се преземаат мерки за расчистување на случајот.“
