Каменица Саса која во пролетниот дел од Првата женска фудбалска лига ќе води борба за титулата одигра пријателски меч против прволигашот Речица, кој заврши со убедлива победа од 0:7 за фудбалерките од малото рударско гратче.
Ова беше можност за стратегот Зоран Златковски да ја провери формата на фудбалерките пред пролетниот предизвик за атак на титулата.
„Одлична проверка на денешниот пријателски натпревар, креиравме многу шанси, покажавме ефективност пред голот на домаќините! Стоевме стабилно во одбрана и покажавме високо ниво на мотивација и колективен дух кои ќе сакаме да ги прикажуваме во пролетниот дел од сезоната. Сите фудбалерки се трудат да го покажат максимумот и да допринесат за подобра игра и победа на нашиот тим. Дури шест фудбалерки од младинските категории веќе добиваат шанса и први минути во првиот тим што само може да не радува и да сме оптимистички расположени за уште подобра иднина, повеќе победи и поголеми успеси“, велат од ЖФК Каменица Саса.
Во пролетниот дел лидерот Тивеерија Брера, Каменица Саса и шампионот Љуботен ќе ја водат борбата за титулата. Пролетната полусезона Каменица Саса ја отвара дома против Атлетико од Битола.
