Македонската кик-боксерката Марија Димовска среде Грција освои златен медал на Атина Челинџ Европскиот Куп и го развеа македонското знаме со голема радост и среќа после овој голем успех. Димовска во големото финале на категорија лоукик до 60 килограми славеше против Гркинката Хелен Каталагариану.
Димовска е член на кик бокс клубот Енерџи од Битола, каде кик-боксерката работи со искусниот тренер Александар Димовски, а резултатите на Марија Димовска не се случајни.
Како што вели тренерот Димовски за Спортска Мрежа, со напорна работа и редовно учество на меѓународни рангирани клупски турнири, Марија Димовска има одлични резултати.
„За резултати и успесите на Марија, но и на кик бокс клубот Енерџи можам да кажам дека се е резултат на континуиран тренинг и дисциплина. Резултатите не се случајни и за да се стигне до нив, ние редовно учествуваме на меѓународни рангирани клупски турнири каде со секоја победа собираме ранкинг поени и искуство со најдобрите борци во категоријата и дисциплината во која се натпреваруваме“, изјави тренерот Алексадар Димовски за Спортска Мрежа.
Димовска е репрезентативец на Македонија од 2022 година како постар кадет, кога сè уште се бореше на татами во дисциплината киклајт, раскажува тренерот Димовски за Спортска Мрежа.
Пред две години односно во 2023 година Димовска станува вице европски првак на Европското првенство за млади во Истанбул, Турција, а веќе во 2024 година Димовска со напорна работа и тренинзи го освојува златниот медал на Светското првенство за млади во Будимпешта, Унгарија. Дополнително, Димовска има уште еден голем успех зад себе, бидејќи таа е цела година без пораз во дисциплината и категоријата на која се натпреварува, односно тоа е лоукик јуниор на минис 60 килограми.
Како што вели тренерот Александар Димовски, резултат за ваквите големи успеси на Марија и на кик бокс клубот Енерџи е континуиран тренинг и дисциплина, а Марија тоа го покажува со бројните медали кои ги освојува на големите натпреварувања.
