Третолигашот Слога Виница не застанува со ангажирање на нови играчи за пролетниот дел од сезоната, клубот предводен од Емил Грнев доби два нови играчи за вториот дел од сезоната. Се работи за Филип Петковски и за голманот Јован Стојанов, кој веќе се претставени во дресот на новиот клуб.
34-годишниот Петковски е искусен играч кој носи големо искуство во Слога Виница, доаѓа од редовите на некогашниот прволигаш Еуромилк, а низ својата кариера има настапувано и за Вардар Неготино, Гостивар, Вардар, Скопје, Тетекс, Работнички, Ренова, Брера Струмица, Хоризонт Турново и Тиквеш. Стојанов е млад и талентиран голман кој во Слога Виница доаѓа од екипата на Вардар Неготино.
Слога Виница без проблеми ќе се прошета низ Трета лига – Исток и ќе го потврди првото место, па затоа фокусот е ставен на баражот за Втората лига, меч кој е клучен за враќање во Втората лига.
Слога Виница, како што веќе информираше Спортска Мрежа е на подготовките во Дојран, каде СЦ „Истатов“ нуди одлични услови за работи и подигање на формата, а во Дојран екипата на Слога Виница ќе одигра и два пријателски натпревари против второлигашот Кожуф и Вардар Неготино.
