Есенскиот шампион во Првата женска фудбалска лига, Тиверија Брера, ја засили својата екипа за пролетниот дел од сезоната со искусната фудбалерка од Кенија, 33-годишната Кристине Нафула.
Нафула, која игра на позицијата напаѓач, зад себе има богата кариера. Таа настапувала за неколку екипи во родната Кенија, како и во шампионатите на Грција, Шведска и Турција, стекнувајќи меѓународно искуство.
Со репрезентацијата на Кенија, Нафула го оствари најголемиот успех во 2016 година, кога нејзиниот тим се квалификуваше за Африканскиот Куп на нации.
„Околината овде е добра и одлично бев прифатена во тимот, се надевам на одлична сезона, исполнета со добри резултати, тимска и напорна работа. Многу сум возбудена што сум овде,“ изјави Нафула.
Целта на Тиверија Брера во пролетниот дел од сезоната е да ја осигура шампионската титула.
