Ракометарите на Вардар 1961 приредија одлично издание на гостувањето кај францускиот Нант и славеа со убедливи 33-27 во Лигата на шампионите. „Црвено-црните“ ја крунисаа добрата игра со значајна победа, а тренерот Иван Чупиќ посочи дека тимот конечно ја добил наградата за вложениот труд во претходните европски натпревари.
Стратегот на вардарци се осврна на пропуштените можности во завршниците на претходните дуели, кога скопскиот тим останувал без посакуваниот резултат и покрај добрите настапи. Токму затоа, триумфот над Нант има дополнителна тежина за екипата, која успеа да ја претвори добрата игра во два значајни бода.
„Имавме четири тешки натпревари што ги загубивме во последните минути, со еден или два гола разлика. Чекавме еден совршен натпревар и два бода на кои ќе можеме да им се израдуваме. Беше важно да покажеме дека сме подобри отколку на претходните натпревари“, истакна Иван Чупиќ.
Победата во Франција е потврда дека Вардар може рамноправно да се надигрува со силните европски ривали, а за „црвено-црните“ овој триумф претставува и дополнителен мотив за продолжението од сезоната во Лигата на шампионите.
