Ракометарите на Еурофарм Пелистер не успеаја да стигнат до позитивен резултат на гостувањето во Германија, откако загубија од Гумерсбах со убедливи 38-28 во натпреварот од третото коло во Европската лига на ЕХФ. Битолчани имаа добар почеток и парираа во воведниот дел, но серијата грешки му овозможи на германскиот состав да ја преземе контролата и да стигне до сигурен триумф.
Избраниците на Лино Червар добро го отворија дуелот и со погодоците на Серафимов и Ристевски поведоа со 2-0. Никола Митревски се истакна и со одбранет пенал на Рогановиќ, па македонскиот тим во првите минути покажа дека може да му создаде проблеми на ривалот.
Сепак, Гумерсбах брзо одговори и го презеде водството, а во продолжението се играше израмнето сè до средината на првото полувреме. Пелистер успешно ја користеше играта со седум ракометари во нападот, но техничките грешки постепено почнаа да го менуваат текот на натпреварот.
Домашниот тим го искористи секој пропуст на битолчани, особено загубените топки, по кои неколкупати погоди на празна мрежа. Во период кога Пелистер се мачеше да најде решение во нападот, Гумерсбах направи серија и се одлепи на највисоки шест гола предност (16-10).
Филип Кузмановски се обиде да го задржи својот тим во игра, па со неколку погодоци ја намали негативата. Сепак, новите грешки во завршницата на првиот дел му овозможија на германскиот состав повторно да се одвои, а на паузата резултатот беше 20-15.
Во второто полувреме Пелистер не успеа да го повтори добриот почеток од средбата. Гумерсбах продолжи со ефикасната игра, ги казнуваше пропустите на гостите и постепено ја зголемуваше предноста. Червар се обиде со измени во бековската линија, а шанса доби и Татар, кој врза три гола по ред, но тоа не беше доволно за да се внесе неизвесност во финишот.
Германците сигурно го контролираа резултатот во последните десет минути и заслужено славеа со конечни 38-28, нанесувајќи му го на Еурофарм Пелистер вториот пораз во досегашниот тек од натпреварувањето.
Во редовите на битолчани, Филип Кузмановски беше најефикасен со седум погодоци, додека Видомски и Ристевски постигнаа по четири. Голманите Хеидарирад и Митревски заедно забележаа 11 одбрани.
Кај победничкиот состав блескаше Душебаев со девет гола, додека Хоржен и Рогановиќ постигнаа по шест погодоци.
За Еурофарм Пелистер сега следува нова можност за поправен испит против истиот противник. На 17 ноември, Гумерсбах ќе гостува во Битола, каде што македонскиот тим ќе се обиде да возврати и да ги подобри шансите за пласман во елиминациската фаза.
