Шефот на стручниот штаб на Кожув, Миодраг Тодоровиќ, верува дека неговиот тим подготвен го дочекува стартот на новата кошаркарска сезона. Кожув меѓу првите екипи ги започна подготовките, а според Тодоровиќ, времето искористено за работа овозможило тимот да биде подготвен и физички и психички.
„Почнавме меѓу првите екипи со подготовките оваа година, поточно на 19. август, и тоа беше доволно време екипата да се спреми, како физички така и психички, и можам да кажам дека ја дочекуваме на највисоко спремно ниво првата средба во новата сезона“, вели Тодоровиќ.
Тој очекува интересна и изедначена сезона, со оглед на засилувањата кај повеќе екипи во однос на минатата сезона.
„Лигата, според мене, ќе биде многу изедначена. Некои клубови се засилија доста за разлика од лани. Некои можеби и не толку, ама оваа година, ми се чини дека може да биде најинтересно и најнеизвесно. Предноста на мојот тим годинава треба да ја прави физичката подготвеност“, додава тренерот на Кожув.
За Тодоровиќ, секој натпревар носи своја тежина, но победнички старт би бил особено важен за тимот и навивачите.
„Победата е важна во секое коло, не само во првото. Но сепак, премиерното коло си носи своја тежина и важност. За нас ќе биде од огромно значење да извојуваме победа, да испратиме порака до навивачите дека на секој натпревар ќе одиме на победа!“
