Текстилец од Штип продолжува со максимален ефект во новата сезона во Првата ракометна лига. Штипјани на домашен терен убедливо го совладаа Партизан од Гевгелија со 43:31 и по три одиграни натпревари имаат три победи.
Кирил Миленков со осум погодоци беше најефикасен кај победничкиот состав, додека кај Партизан ист број голови постигна Димитар Атанасов.
Преспа ја забележа првата победа сезонава, откако на домашен терен славеше против Шампион со 30:17. Томче Трајчевски постигна шест гола за Преспа, додека Филип Спирковски беше најпрецизен кај гостите со пет.
Без победник заврши дуелот на ланските суперлигаши Пролет и Радовиш. Натпреварот донесе голема драма и резултат 29:29. Радовиш беше близу до освојување на двата бода, но на крајот мораше да се задоволи со реми. Јован Соколовски постигна седум гола за Пролет, а Васе Петров беше прв стрелец кај гостите со 10 погодоци.
Драчево Јуниор славеше со 33:25 против Овче Поле – Стефан Крстевски имаше пет гола за домаќинот, а за гостинот Филип Петровски се истакна со шест гола. Македонија Ѓорче Петров беше убедлива на гостувањето кај Јехона со 23:35. Јовица Костоски имаше шест гола за поразениот тим, а за победничкиот се истакна Мартун Бучуковски со 11 гола. Аеродром со 40:31 го совлада Илинден. Бојан Божиновски постигна дури 13 гола за домаќинот, а девет имаше Михаил Митановски, а пак за гостинот Антонио Наковски имаше осум гола.
Најубедлив пораз забележа составот на Сокол Саса. Дебитантот од Македонска Каменица пред домашната публика загуби со 29:50 од поранешниот суперлигаш Вардар Неготино. Мирче Ѓеоргиев постигна дури 18 гола за поразениот тим, кај победникот Костадин Петров се истакна со 14 погодоци.
По три кола, Текстилец е лидер со максимални шест бода, пред Пролет со пет. Македонија Ѓорче Петров, Аеродром, Драчево Јуниор и Партизан имаат по четири бода.
- ТАБЕЛА ПРВА РАКОМЕТНА ЛИГА:
Вардар Неготино е седми со три бода, додека Илинден, Јехона, Радовиш, Овче Поле и Шампион имаат по два. На последното, 14. место, без бодови е Сокол Саса.
