Брегалница се врати на победнички патеки со минимален триумф од 1:0 против Скопје во натпреварот со кој беше комплетирано осмото коло во Првата македонска фудбалска лига.
Штипјани на домашен терен стигнаа до трите бода со погодокот на Иван Глигоров во 72. минута. Напаѓачот ја затресе мрежата по асистенцијата на Методи Максимов, што се покажа како единствениот, но доволен гол за Брегалница да ја запише победата.
Со освоените три бода, Брегалница направи скок на шестото место на табелата со 10 бодови, додека Скопје останува на последната позиција со само три освоени бодови по осум одиграни кола.
Со овој дуел официјално е комплетирана осмата рунда од шампионатот. Следува репрезентативната пауза, по која прволигашката конкуренција ќе продолжи со натпреварите од деветтото коло.
