Сите погледи утре ќе бидат насочени кон Радовиш и Тетово, каде што ќе се одиграат двата одложени натпревари од четвртото коло во Втората македонска фудбалска лига. Во центарот на вниманието е борбата за врвот на табелата, бидејќи резултатите од овие дуели можат да донесат промена на лидерската позиција.
Најголем интерес предизвикува гостувањето на Охрид кај Детонит Плачковица. „Рибарите“ во овој момент се во можност со победа да стигнат до првото место на табелата. Три бода во Радовиш би значеле преземање на лидерската позиција од Пелистер, додека секој друг резултат би му овозможил на битолскиот состав да остане на врвот.
За Детонит Плачковица, пак, ова е можност за прекин на негативната серија. Радовишани во претходните две гостувања претрпеа порази од Новаци и Камјани, па пред својата публика ќе бараат резултат со кој би се вратиле на победничкиот колосек.
Интересно ќе биде и во Тетово, каде што Тетекс ќе го пречека Работнички. „Романтичарите“ исто така имаат шанса да се вмешаат во трката за лидерската позиција. Победа против „штофарите“ би била значаен чекор, особено ако се има предвид дека на Работнички потоа му останува и одложениот домашен натпревар против Брера Струмица.
Доколку Работнички успее да ги освои бодовите и во Тетово, а потоа слави и против Брера во заостанатиот дуел, скопскиот тим би се вклучил во сериозна борба за самиот врв на второлигашката табела.
Токму поради тоа, утрешните натпревари се од големо значење и за Пелистер, кој внимателно ќе ги следи случувањата во Радовиш и Тетово. Битолчани имаат интерес резултатите да им одат во прилог и да ја задржат лидерската позиција по комплетирањето на заостанатите средби.
Со утрешните два натпревари ќе се комплетира четвртото коло, додека потоа ќе остане уште дуелот Работнички – Брера Струмица, со кој ќе биде комплетирано и петтото коло.
Откако ќе се одиграат и овие заостанати натпревари, по шест одиграни кола конечно ќе добиеме комплетна и пореална слика за распоредот на силите и борбата за лидерската позиција во Втората македонска фудбалска лига.
