Актуелниот шампион Вардар не го започна според посакуваниот план новото првенство во Првата лига. „Црвено-црните“ во последното коло не успеаја да стигнат до трите бода, одигрувајќи 3-3 на гостувањето кај Башкими во Куманово.
Сепак, тој натпревар е веќе зад нив, а фокусот е ставен на новиот предизвик. Вардар вечерва на стадионот на комплексот на ФФМ го пречекува составот на Шкендија Арачиново, кој се наметна како едно од најпријатните изненадувања на почетокот од сезоната.
Избраниците на Миодраг Божовиќ влегуваат во натпреварот со јасна цел – победа и освојување на трите бода, со кои би се вратиле на победничкиот пат.
„Вардар е актуелен шампион и ние секогаш размислуваме само за победа. Така е и во пресрет на вечерашниот меч против Шкендија Арачиново. Тие се во одличен ритам и нанижаа неколку победи, а тоа е уште еден мотив повеќе за нас да бидеме максимално подготвени и да пристапиме кон овој дуел со должно внимание. Подготвени сме за надигрување и ги посакуваме трите бода“, вели Маневски.
Во моментов, Шкендија Арачиново е подобро пласирана од Вардар на табелата и се наоѓа на четвртата позиција, со два повеќе од актуелниот првак.
Натпреварот е закажан за 20 часот на теренот на Фудбалската федерација на Македонија, а ќе го суди Доне Ристовски.
