Во рамките на 8. коло од Првата фудбалска лига на Македонија, Шкендија Арачиново му гостува на актуелниот шампион Вардар, во натпревар во кој „арачиновци“ влегуваат со голема самодоверба.
Тимот на Шкендија е во одличен победнички ритам и зад себе има серија од четири последователни триумфи. По домашниот пораз од Арсими (0-2), арачиновци успеаја да се консолидираат и да забележат значајни резултати.
Шкендија славеше на тешките гостувања кај Башкими (2-1) и Брегалница (1-0), а во Купот на Македонија беше подобра од Детонит Плачковица со 3-1. Победничката серија продолжи и во минатото првенствено коло, кога пред своите навивачи го совладаа Скопје со минимални 1-0.
„Ова е меч како и секој друг и носи исти вредни три бода. Се наоѓаме во одлична форма со четири победи по ред во Првата Лига и Купот. Го почитуваме противникот сè до почетокот на натпреварот, но на теренот влегуваме без никаков респект, одиме исклучиво на победа за да ја продолжиме позитивната серија и да ги израдуваме нашите верни навивачи“, изјави Демири.
