Дејвис куп репрезентативецот на Македонија, Калин Ивановски, по пауза од два месеца поради повреда, се врати на тениските терени, но не успеа да ја мине првата пречка на ИТФ 25 турнирот на Златибор.
Ивановски во првото коло загуби од Јапонецот Рио Табата со 2-1 во сетови (6:1, 4:6, 10:6). Македонскиот тенисер последниот меч го одигра во средината на јули, а по враќањето на теренот лошо го започна дуелот. Табата го освои првиот сет со убедливи 6:1 во гемови.
Во вториот сет Јапонецот повторно поведе со 2:0, но Ивановски успеа да направи пресврт. Со два направени брејка го освои сетот со 6:4 и израмни на 1-1.
Во решавачкиот сет не се играше во класичен формат, туку до 10 освоени поени. Причина за тоа беа проблемите со распоредот на мечевите во претходните денови поради лошите временски услови. Табата беше поуспешен и во супер тај-брејкот славеше со 10:6.
Ивановски следната недела го очекува настап на турнирот во Пардубице, Чешка.
На турнирот на Златибор настапува и вториот Дејвис куп репрезентативец на Македонија, Олег Приходко. Тој успешно го мина првото коло, откако без поголеми проблеми го совлада Вељко Крстиќ со 2-0 во сетови (6:2, 6:1).
Приходко настапува и во конкуренција на двојки, каде што заедно со Денис Клок обезбедија пласман во полуфиналето. Утре ќе играат против бугарската комбинација Алекс Генчев и Ентони Гемов.
Приходко утре го очекува и натпревар во сингл, против Дражен Петровиќ од Босна и Херцеговина. Доколку слави, истиот ден ќе го одигра и четвртфиналниот меч.
