Брера Струмица оствари одличен резултат на првиот натпревар во младинската Лигата на шампионите, откако на гостувањето во Андора убедливо со 0:3 ја совлада Санта Колома.
По првите 45 минути мрежите мируваа, но во второто полувреме струмичани целосно го презедоа натпреварот и со далеку подобра игра го скршија отпорот на домаќинот. Екипата предводена од искусниот стратег Ѓорѓе Стојчев го покажа квалитетот и во европски рамки.
Главниот јунак на Брера беше Глигор Бучков, кој постигна два гола и ѝ донесе комотна предност од 0:2 на својата екипа. Резултатот го отвори во 57. минута, во 80. минута ја дуплираше предност. Во самиот финиш следуваше и третиот погодок, кога Филип Кулески ја затресе мрежата за конечни 0:3 во 87. минута и започна големото славје на струмичани.
Статистиката дополнително ја потврдува доминацијата на Брера, која контролираше во повеќе сегменти од играта. Санта Колома немаше решение за македонскиот шампион, кој до титулата во домашното првенство стигна без ниту еден пораз.
Брера така продолжува да ја пренесува доминацијата од домашната сцена и на европските натпревари. Со предност од три гола, струмичани ќе го пречекаат тимот од Андора на 14 октомври, во реваншот во Струмица.
Пласманот во следната рунда е на дофат, а Брера Струмица има огромна залиха пред домашниот реванш во борбата за продолжување на европската авантура во Младинската Лига на шампиони.
