ГРК Охрид стигна до првата победа во новата сезона во Супер лигата, откако во „Билјанини Извори“ убедливо ја совлада Струга со 33-16 (17-8) во Езерското дерби.
Домашниот состав, уште од воведните минути покажа дека нема да дозволи неизвесност. Охриѓани брзо ја презедоа контролата, ја наметнаа својата игра и во текот на првиот дел постојано ја одржуваа предноста. Во завршницата од полувремето следуваше дополнително одлепување, па на паузата Охрид замина со комотни девет гола разлика.
Ниту продолжението не донесе промена на текот на натпреварот. „Гладијаторите“ продолжија во ист ритам, додека Струга имаше сè поголеми проблеми да најде решение во нападот. Предноста на домаќинот постепено растеше, а во 45. минута семафорот покажуваше 24-10.
Во последниот дел Ројевиќ им даде шанса и на останатите ракометари, меѓу кои и голманот Ѓорѓески и Карапалевски, но Охрид без проблем го задржа убедливото водство до самиот крај. По 60 минути игра резултатот гласеше 33-16.
Најефикасен кај победничкиот тим беше Мате со седум гола, додека Зечевиќ и Јошида придонесоа со по пет погодоци. Кај Струга, Танкоски, Георгиевски и Пајкоски постигнаа по три гола.
Охрид со оваа победа го заокружи дербито со сигурна и убедлива претстава пред домашната публика, додека Струга ќе бара поправен резултат во следното коло. „Гладијаторите“ гостуваат кај Бутел во Скопје, а Струга на свој терен ќе го пречека Еурофарм Пелистер.
