Градскиот стадион во Радовиш добива нов и помодерен изглед, со што условите за следење на фудбалските натпревари во градот се подигнуваат на повисоко ниво. Како дел од подобрувањето на инфраструктурата, стадионот доби 1.500 нови столчиња, донација од Фудбалската федерација на Македонија (ФФМ).
Со поставувањето на столчињата, една од трибините целосно ќе биде подготвена за саботниот натпревар, додека работата на втората трибина ќе продолжи, со план таа да биде комплетирана за еден од следните домашни натпревари.
Од ФК Детонит Плачковица упатуваат благодарност до Фудбалската федерација на Македонија и претседателот Масар Омерагиќ за поддршката и ангажманот во подобрувањето на условите на Градскиот стадион во Радовиш.
Донацијата е уште еден пример за активната поддршка што ФФМ ја насочува кон подобрување на фудбалската инфраструктура низ Македонија, со цел стадионите и спортските објекти да обезбедат подобри услови за клубовите, фудбалерите и навивачите.
Новото лице на стадионот ќе биде промовирано во вистински фудбалски амбиент. Во сабота Детонит Плачковица на домашен терен го пречекува Осогово, во рамките на 4. коло од Втората македонска фудбалска лига.
Со новите трибини и подобрените услови, Радовиш добива уште една причина за поголема посетеност и уште подобра атмосфера на домашните натпревари.
